पूर्व अन्तरिम सांसद तथा भारत–नेपाल ओहोर–दोहोर गरिरहने कांग्रेस कार्यकर्ता अमरेशकुमार सिंहलाई सोमबार बेलुकादेखि प्रधानमन्त्रीले ३ जना सुरक्षाकर्मी थपिदिएका छन् । पूर्व गृहमन्त्री एवं निवर्तमान उपप्रधानमन्त्री कृष्णप्रसाद सिटौलाकै पालामा अमरेशले प्रयोग गरिरहेको नेपाल प्रहरीको गाडी, चालक र एकजना सुरक्षाकर्मी कसरी फिर्ता गर्ने भन्ने भैरहेका बेला बाबुराम सरकारले उनको सुरक्षाका लागि ३ जना सशस्त्र प्रहरी थप्ने निर्णय गरेको हो ।

सिंहलाई त्यस्तो दिन सुरक्षाकर्मी थपिएको छ, जुन दिन गृह मन्त्रालयमा पूर्वप्रधानमन्त्री गिरिजाप्रसाद कोइरालाको बिराटनगरस्थित निवासबाट १० जना सशस्त्र सुरक्षाकर्मी झिक्नेबारे छलफल चल्यो । र, त्यही दिन स्वर्गीय पूर्वप्रधानमन्त्री कृष्णप्रसाद भट्टराईको निवासमा रहेका ५ प्रहरीलाई समेत फिर्ता गर्ने या ट्रष्टको सुरक्षार्थ खटाउनेबारे अलमल सुरु भयो । केही महिनाअघि सर्वाेच्च अदालतले मरिसकेका भिआइपीलाई पनि अंगरक्षक दिइएको भन्दै फिर्ता गर्न सरकारलाई निर्देश गरेको थियो ।

यता न्यायाधीश बमको हत्यापछि सर्वाेच्चका १५ न्यायाधीशलाई १ कमाण्डर र ४ सिपाहीको नफ्रीमा सुरक्षा दिने निर्णय सरकारले गरेको छ । पूर्व न्यायाधीशहरुलाई पनि सुरक्षाकर्मी दिइने भनिए पनि चारआना जग्गामा घर बनाएका वा डेरामा बसिरहेका न्यायाधीशहरुले राख्ने ठाउँ नभएर सुरक्षाकर्मी लिन मानेका छैनन् । उता सर्वाेच्चको आदेशपछि अंगरक्षक फिर्ता गरेका पूर्वगृहसचिव उमेश मैनालीलाई धम्की आएपछि अस्ति सोमबारदेखि नै सुरक्षा दिने निर्णय सरकारले गरेको छ ।